Holukeppni GKG!

Nú förum við af stað með holukeppni GKG árið 2021 með stæl! Eins og síðustu ár verður keppt í kvenna- og karlaflokkum. Að hámarki geta 64 skráð sig til leiks í hvorum flokki. Í lok sumars munu holumeistari karla og kvenna leika til úrslita um titilinn holumeistari GKG 2021.

Skráningarfrestur er til 31. maí. Mánudaginn 31. maí verður dregið um hverjir/hverjar leika saman. Að jafnaði hafa leikmenn 2 vikur til að ljúka leik sínum, en 3 vikur í kringum meistaramót GKG. Úrslit í hvorum flokki eiga að liggja fyrir í síðasta lagi 27. ágúst. Úrslitaleikur um holumeistara GKG árið 2021 fer síðan fram 29. ágúst og verður verðlaunaafhending í kjölfarið. Nákvæm dagsetning verður birt síðar.

Keppendur koma sér saman um leiktíma og skrá rástíma á golfbox. Hlekkur verður sendur til keppanda þegar holukeppnin er spiluð þar sem þau finna sinn leik og skrá stöðuna beint. Þannig verður bæði hægt að fylgjast með keppninni úr fjarlægð og skorið er þá þegar til í kerfinu þannig að keppendur staðfesta það við starfsfólk Proshop þannig að skorinu verði læst.

Keppendum er vinsamlegast bent á að notfæra sér þjónustu ja.is til að finna símanúmer andstæðings síns, ef þeir þekkja ekki til hans.

Reglugerð um holukeppni GKG

1. gr.
Mótið skal halda árlega og keppt verður í karla- og kvennaflokki. Hámarks leikforgjöf skal vera 36.

2. gr.

Mest 64 keppendur geta skráð sig í hvorn flokk. Þegar skráningarfresti lýkur verður dregið um hverjir leika saman.

3. gr.

Aðeins kylfingar með gilda EGA forgjöf hafa keppnisrétt í holukeppninni.

4. gr.

Leikmaður ræður af hvaða teig hann leikur og tekur leikforgjöf hans mið af því. Nota skal grunnforgjöf eins og hún er, þegar leikur fer fram við útreikning leikforgjafar, þó með hámarksleikforgjöf skv. 1.gr. Forgjöf nýtist í samræmi við forgjafarröð vallarins. Sé annar leikmaður t.d. með 10 í forgjöf en hinn 18, fær forgjafarhærri leikmaðurinn forgjöf á hinn leikmanninn á holum 1-8 í forgjafarröð.

5. gr.
Í hverri umferð í holukeppninni eru leiknar 18 holur. Leika skal til úrslita í hverjum leik. Verði leikmenn jafnir eftir 18 holu leik skal leikið áfram og fyrsta unnin hola ræður úrslitum.

6. gr.
Mótanefnd ákveður lokafresti til að ljúka hverri umferð holukeppninnar og tilkynnir það í mótaskrá og á auglýsingatöflu. Keppendur í holukeppni koma sér saman um hvenær þeir kjósa að leika hverja umferð fyrir þann lokafrest. Geti keppandi ekki leikið, eða mæti hann ekki til leiks á tilskildum tíma hefur hann tapað leik sínum. Mæti hvorugur keppenda til leiks fyrir lokafrest til að ljúka umferð falla þeir báðir úr keppninni. Ef leikmenn geta ekki komið sér saman um leiktíma, geta þeir leitað til mótstjóra um milligöngu.

7. gr.
Sigurvegarar í hvorum flokki hljóta titilinn Holumeistari karla og Holumeistari kvenna. Holumeistararnir leika til úrslita um titilinn Holumeistari GKG. Þau sem lenda í 2. sæti í hvorum flokki leika um 3. sæti Holukeppni GKG. Titlunum Holumeistari GKG, Holumeistari karla og holumeistari kvenna fylgja farandgripir.

Garðabæ,

7. júní 2020

Holukeppni GKG - Konur