Holukeppni GO 2023 karlaflokkur

Athugið að um er að ræða forskráningu í mótið þar sem 64 keppendur komast inn í fyrstu umferð, dregið verður um hver mætir hverjum. Keppt er í karla og kvennaflokki og sigurvegarar þar mætast svo í úrslitaleik um heiðurinn holukeppnismeistari GO.

Áætlaðir leikdagar í hverri umferð til viðmiðunar

Áætlaðir leikdagar í hverri umferð til viðmiðunar.

Umferð 25. júní – lok dags 14 júlí. (64)
Umferð 15. júlí – lok dags 25. júlí. (32)
Umferð 26. júlí – lok dags . 2. ágúst (16)
Umferð 3. ágúst – lok dags 15. ágúst. (8) athugið að völlurinn er lokaður 8 - 13. ágúst
Umferð 16. ágúst – lok dags 24. ágúst. (4)
Umferð 25. ágúst – lok dags 29. ágúst. (Úrslitaleikir karla og kvenna)
Umferð 30. ágúst – lok dags 1. sept. (Úrslitaleikur Holukeppni GO)

Skráning fer fram á golfbox.golf og lýkur skráningu 24. júní kl.12.00.
Dregið verður um rásnúmer og raðað í keppnistré og keppendur fá póst um hver er þeirra mótherji þann 25. júní og 1. umferð hefst þann dag. Keppendur koma sér saman um leiktíma og skrá rástíma á golfbox. Hægt er að fá aðstoð í afgreiðslu við að fá upplýsingar um símanúmer eða netföng keppenda.

Reglugerð Holukeppni GO

1.gr
Mótið skal halda árlega og hefjast með forkeppni sem er 18 holu punktakeppni með forgjöf. Forkeppnina má þó fella niður ef mótanefnd ákveður svo. Hámarks leikforgjöf kvenna skal þó vera 28, bæði í forkeppninni og í holukeppninni og karla 24, bæði í forkeppninni og holukeppninni. Forkeppnina má spila sem hluta af öðru móti ef mótanefnd ákveður svo.
Mótanefnd hefur heimild til að fylla upp í keppnistréð ef næg þáttaka næst ekki í forkeppninni. Miðað er við 64 keppendur í hvorum flokki. Mótanefnd hefur heimild til að leyfa ótakmarkaðan fjölda keppenda. Ef um er að ræða skráningu en enga forkeppni fá fyrstu 64 skráðir keppendur þátttökurétt.

2.gr
Þeir 64 keppendur sem ná bestum árangri í karla og kvennaflokki í forkeppninni eða fyrstu 64 skráðir skv. auglýsingu, taka þátt í holukeppni með forgjöf, þar sem keppt er um titilinn holumeistari karla og holumeistari kvenna. Holumeistari karla og holumeistari kvenna leika svo til úrslita um titilinn: Holumeistari GO. Þeir kylfingar sem lenda í öðru sæti í karla og kvennaflokki keppa um þriðja sætið. Verði tveir eða fleiri keppendur í forkeppninni jafnir á sama skori ræðst röð keppenda eins og kveðið er á um í 5. grein Móta- og keppendareglna GSÍ. Ef keppendur eru með jafn marga punkta eftir 18 holur skal seinni 9 holur ráða. Svo eru síðuðstu 6 og síðan 3 og síðan síðasta. Ef enn er jafnt skal telja upp frá 17.holu þar til úrslit ráðast. Ef enn er jafnt skal hlutkesti ráða.

3.gr
Aðeins kylfingar með gilda EGA forgjöf hafa keppnisrétt í holukeppninni.

4.gr
Leikmaður ræður af hvaða teig hann leikur og tekur leikforgjöf hans mið af því, þó með þeim takmörkunum að aldur og forgjöf ræður teig skv. reglugerðum. Nota skal grunnforgjöf eins og hún er, þegar leikur fer fram við útreikning leikforgjafar, þó með hámarksleikforgjöf skv. 1.gr. Forgjöf nýtist í samræmi við forgjafarröð vallarins. Sé annar leikmaður t.d. með 10 í forgjöf en hinn 18, fær forgjafarhærri leikmaðurinn forgjöf á hinn leikmanninn á holum 1-8 í forgjafarröð.

5.gr
Í hverri umferð í holukeppninni eru leiknar 18 holur. Leika skal til úrslita í hverjum leik. Verði leikmenn jafnir eftir 18 holu leik skal áfram leikið og gildir forgjöf leikmanns áfram. Fyrsta unnin hola ræður úrslitum.

6.gr
Mótanefnd ákveður lokafresti til að ljúka hverri umferð holukeppninnar og tilkynnir það á heimasíðu og á auglýsingatöflu í golfskála. Keppendur í holukeppni koma sér saman um hvenær þeir kjósa að leika hverja umferð fyrir þann lokafrest. Geti keppandi ekki leikið, eða mæti hann ekki til leiks á tilskildum tíma hefur hann tapað leik sínum. Mæti hvorugur keppenda til leiks fyrir lokafrest til að ljúka umferð falla þeir báðir úr keppninni. Ef leikmenn geta ekki komið sér saman um leiktíma, geta þeir leitað til mótstjóra um milligöngu. Mótstjórn ákveður þá leiktíma sem að óbreyttu ef ekki er auglýstur sérstaklega skal vera klukkan 10:00 á auglýstum lokadegi umferðar. Sé rástími klukkan 10:00 ekki laus skal næsti lausi rástími verða fyrir valinu.

7.gr
Sigurvegari í holukeppninni karla og kvenna ár hvert hlýtur titilinn holumeistari karla og holumeistari kvenna og fylgir titlinum farandgripur og eignargripur. Sigurvegari í holukeppninni ár hvert hlýtur titilinn Holumeistari GO og fylgir titlinum farandgripur. Einnig hlýtur holumeistarinn verðlaunagrip til eignar. Holumeistari ársins er krýndur og fær afhentan farandgripinn í verðlaunaafhendingu meistaramóts GO.

Holukeppni Karla 2023