Viðbótar staðarreglur 14.7.2021

Vallarmarkahlutir (regla 2.1) eru hvítar stikur og hvítar línur vallarmegin á malbikuðum vegi, hægra megin á 4. 6. og 10. holu, og vinstra megin á 12. og 13. holu.

Áhaldahús er utan vallar, svæðið er merkt með hvítum stikum.

Girðing, hvítar stikur og hvít merking á Fjósakletti eru vallarmarkarhlutir á 8. holu.

Hvítar stikur milli 16. og 18. holu eru vallarmarkahlutir þegar

16. hola er leikin en á öðrum holum eru stikurnar óhreyfanlegar hindranir.

Eftirtalin ómerkt svæði eru GRUND í AÐGERÐ. Skemmdir (eftir varnargirðingar) sem eru innan við pútters fjarlægð frá flatarkanti. Ekki er veitt lausn frá stöðu eða púttlínu. Aðeins ef boltinn liggur í skemmdinni.

Jarðfastir steinar og berar klappir á svæðum sem slegin eru í brautarhæð eða neðar eru óhreyfanlegar hindranir.

Allar fjarlægðamerkingar, bekkir, ruslafötur og vökvunarkerfi eru óhreyfanlegar hindranir.

Leikhraða og hegðunarreglur GSÍ.

Almennar starreglur GSÍ um leikhraða leikmanna eru í gildi Hámarks leiktími fyrir 18 holu umferð er:4 klst og 14 mín.
(2 klst. og 2 mín. fyrir 9 holur).

Almennar staðarreglur GSÍ um hegðun leikmanna eru í gildi.

Leikfyrirkomulag og rásröðun

Keppt skal samkvæmt gildandi reglugerð um Íslandsmót í flokki eldri kylfinga og móta- og keppendareglum GSÍ. Leika skal 54 holur höggleik á þremur dögum. Aldur miðast við almanaksár. Ef jafnt er að loknum 54 holum skal leika þriggja holu umspil og síðan bráðabana ef þörf er, um 1. sæti. Komi til umspils um 1. sæti verða holur 16,17 og 18 leiknar og síðan 18. hola leikin endurtekið ef kemur til bráðabana. Ekki skal leikið um önnur sæti. Í mótinu er eingöngu keppt í neðangreindum flokkum án forgjafar.

Þátttökuréttur

Öldungaflokkur karla (50 ára og eldri)

Öldungaflokkur karla (65 ára og eldri)

Öldungaflokkur kvenna (50 ára og eldri)

Öldungaflokkur kvenna (65 ára og eldri)

Aldur miðast við almanaksár.

Hámarksfjöldi keppenda er 150, þar af 108 í flokkum 50 ára og eldri (54 karlar og 54 konur) og 42 í flokkum 65 ára og eldri (21 karl og 21 kona).

Þátttökurétt öðlast erlendir kylfingar ekki fyrr en eftir a.m.k. þriggja ára samfellda búsetu hérlendis. Þurfi að skera niður fjölda þátttakenda skulu forgjafarlægstu keppendur kl. 8:00 morguninn eftir að skráningarfresti lýkur fá þátttökurétt. Standi val á milli keppenda með jafnháa forgjöf skal hlutkesti ráða.

Þátttakendalisti eftir niðurskurð verður birtur kl. 14:00 á þriðjudeginum 6. júlí.

Verði ekki full skráning í einhverjum flokki skal fjölgað í flokki hins kynsins í sama aldursflokki. Að því frátöldu skal fjölga í hinum aldurflokknum, jafnt í báðum kynjum. Mótsstjórn er heimilt að fjölga keppendum í einstökum flokkum til að fylla í ráshópa.

Mótsstjórn er heimilt að takmarka rétt til þátttöku við forgjöf. Í flokkum 65 ára og eldri er notkun golfbíla heimiluð.

Ef keppandi er skráður í tvo flokka skal miða við skráningu hans í eldri flokkinn varðandi hámarksfjölda keppenda, tilfærslur ef ekki verður full skráning í flokka og við röðun í ráshópa.

Þátttökugjöld og skráning

Skráningarfrestur er til kl. 23:59 mánudaginn 5. júlí. Þátttökugjöld skulu greidd við skráningu. Þátttökugjald fæst einungis endurgreitt séu forföll boðuð eigi síðar en kl. 18:00, þremur dögum fyrir fyrsta keppnisdag. Þátttökugjald í mótið er 20.000 kr. og innifalið er miði á lokahóf laugardagskvöldið 17. júlí. Nánari upplýsingar um lokahóf verða birtar síðar.

Verði fullt í mótið munu keppendur sem komust ekki inn í mótið fá endurgreitt að móti loknu.

Rástímar og ráshópar

Rástímar verða birtir á GolfBox á miðvikudeginum 7. júlí. Ræst verður út af 1. teig með 10 mínútna millibili. Á fyrsta keppnisdegi er keppendum raðað út eftir forgjöf en alla aðra daga verður raðað út eftir skori. Ekki verða leyfðar breytingar á útgefnum rástímum eftir birtingu þeirra.

1. hringur, fimmtudagur: Rástímar frá klukkan 07:30 – 15:30

Rásröð: Konur 65+, Konur 50+, Karlar 50+, Karlar 65+

2. hringur, föstudagur: Rástímar frá klukkan 07:30 – 15:30

Rásröð: Karlar 50+, Karlar 65+, Konur 65+, Konur 50+

3. hringur, laugardagur: Rástímar frá klukkan 07:00 – 15:00

Rásröð: Karlar 65+, Konur 65+, Konur 50+, Karlar 50+

Æfingahringur

Einn æfingahringur án endurgjalds er heimilaður. Keppnisvöllurinn verður opinn til æfinga fyrir skráða keppendur í síðasta lagi einum degi fyrir mót. Vinsamlegast hafið samband við klúbbinn til að panta rástíma. Athugið reglur um æfingahringi. Nauðsynlegt er að hafa skráð sig í mótið og greitt mótsgjald til að mega leika æfingahring.

Verðlaun

Veitt verða verðlaun fyrir 1. – 3. sæti í flokki karla 50 ára og eldri og kvenna 50 ára og eldri án forgjafar.

1. sæti: 40.000,- kr. Gjafakort Icelandair

2. sæti: 30.000,- kr. Gjafakort Icelandair

3. sæti: 15.000,- kr. Gjafakort Icelandair

Veitt verða verðlaun fyrir 1. – 3. sæti í flokki karla 65 ára og eldri og kvenna 65 ára og eldri án forgjafar.

1. sæti: 40.000,- kr. Gjafakort Icelandair

2. sæti: 30.000,- kr. Gjafakort Icelandair

3. sæti: 15.000,- kr. Gjafakort Icelandair

Lokahóf fer fram á laugardagskvöldi í golfskálanum og verða verðlaun afhent þar.

Golfbílar

Í golfmótum á vegum GSÍ, að undanskildu Íslandsmóti eldri kylfinga, 65 ára og eldri, skal mótsstjórn aðeins veita þeim keppendum, sem framvísa vottorði frá tilnefndum trúnaðarlækni GSÍ, heimild til að nota golfbíl meðan á keppni stendur. Vottorðið skal staðfesta að keppandinn búi við langvarandi líkamlega fötlun og þurfi á golfbíl að halda við keppni, að því tilskildu að slíkt veiti keppandanum ekki ótilhlýðilegt forskot, sbr. undantekningu 1 við golfreglu 14-3. Trúnaðarlæknar GSÍ er Sveinbjörn Brandsson, sveinbjorn@orkuhusid.is og Valur Guðmundsson, valurgudm@gmail.com.

Umsókn um heimild til notkunar golfbíls skal senda mótanefnd GSÍ að minnsta kosti einni viku áður en mótið hefst. Umsóknin skal send til motanefnd@golf.is og henni skal fylgja afrit vottorðsins.

Mótsstjórn:

Þórður Ingason, Sigursveinn Þórðarson, Styrmir Jóhannsson, Hallgrímur Steinsson, Kristín María Þorsteinsdóttir, Arnar Geirsson, Viktor Elvar Viktorsson.

Netfang mótsstjórnar: motanefnd@golf.is

Dómari: Þórður Ingason, Sími. 825-2878

Birt með fyrirvara um breytingar.

Íslandsmót eldri kylfinga